Доналд Трамп ја нарече церемонијата на отворањето на Олимпијадата во Париз „срамота“, откако нејзините креатори беа на удар на критики затоа што, како што некои рекоа, шоуто отишло предалеку.
„Јас сум многу отворен ум, но мислев дека тоа што го направија е срамота“, изјави Трамп за Фокс њуз.
Неговите коментари уследија по осудата од католичките групи и француските бискупи за сцената на церемонијата во која учествуваа танчери, драг кралици и диџеј во пози што на некои христијани им се чинеше дека потсетуваат на приказите на Тајната вечера, иако креаторите рекоа дека референцата на церемонијата на отворањето не е „Последната вечера“ од Да Винчи, туку „Празникот на боговите“ (1635) на Јан Харменс ван Бијлерт – олимписките богови ја слават свадбата на Тетис и Пелеј, со Аполон крунисан во центарот на масата (не Исус Христос) и Дионис во преден план. Секвенцата наиде на меѓународна критика од христијанските групи и екстремно десничарските политичари на социјалните мрежи.
На прашањето на водителката што би направил доколку биде реизбран за претседател навреме за Олимпијадата во Лос Анџелес во 2028 година, Трамп одговори: „Нема да имаме ‘Тајна вечера’ прикажана на начинот на кој тие ја прикажаа“.
