Војската на Северна Кореја ги објави плановите да ги прекине сите патни и железнички врски со Јужна Кореја, јавија денеска државните медиуми на Пјонгјанг.
Севернокорејскиот генералштаб соопшти дека границата исто така ќе биде засилена со „силни одбранбени структури“ и мерките ќе стапат во сила веднаш, јави државната новинска агенција КЦНА.
Овие акции, вели Северна Кореја, „имаат за цел да ја заштитат националната безбедност и да спречат војна“.
Како што пренесува ДПА, државните медиуми јавија дека севернокорејската армија испратила телефонска порака „на страната на американските сили“ во 9:45 часот за да се избегнат какви било недоразбирања или „случаен конфликт околу процесот на утврдување“.
Јужнокорејската војска соопшти дека во последните месеци Северна Кореја веќе поставила десетици илјади нагазни мини долж границата.
Затворањето на преостанатите патни и железнички врски од страна на Северна Кореја се смета за симболично, бидејќи веќе неколку години нема директна размена преку силно милитаризираната граница меѓу двете земји.
