Јавен обвинител од Основното јавно обвинителство Скопје денеска донесе Наредба за спроведување истражна постапка против две лица за кои постои основано сомнение дека како соизвршители сториле кривично дело – Проневера во службата од член 354 став 3 во врска со став 1 од Кривичниот законик. За уште четири лица е поведена постапка за кривично дело – Злоупотреба на службена положба и овластување од член 353 став 5 во врска со став 4 и став 1 од Кривичниот законик.
ЈОРСМ соопшти дека врз основа на кривични пријави од Министерството за внатрешни работи и од Управата за финансиска полиција е спроведена предистражна постапка во рамки на која се преземени повеќе дејствија, а утрово, врз основа на соодветни судски наредби, извршени се претреси на девет локации во Скопје и на локации во кумановско со цел обезбедување докази за потребите на постапката. Претресите ги вршеле припадници на Министерството за внатрешни работи, под раководство на надлежни јавни обвинители.
Како што се наведува во соопштението, од прибраните докази произлегува основано сомнение дека двајцата соизвршители, како одговорни лица во АД Друштво за приредување игри на среќа „Државна лотарија” на РСМ, во текот на 2023 година, преку вршење на своите посебни овластувања и должности, заедно учествувале во дејствија на извршување на штета на акционерското друштво со намера да прибават противправна имотна корист за друг која се проценува на значителен износ од 501.319.119 денари од буџетот на акционерското друштво.
Првоосомничениот, како што се посочува, делото го сторил во својство на претседател на Управниот одбор – генерален директор на „Државна лотарија”, додека второосомничениот презел дејствија во својство на одговорно лице – претседавач со седница на Влада одржана во својство на собрание на Акционерско друштво за приредување игри на среќа Државна лотарија на Република Северна Македонија.
– Останатите четворица осомничени биле претседател и членови на комисија за два одделни јавни повици, за кои постои сомнение дека ги злоупотребиле посебните овластувања и должности и ги спровеле јавните повици иако знаеле дека таква постапка во конкретните случаи не смее да биде спроведена, бидејќи не биле исполнети законски услови, се наведува во соопштението.
Од ЈОРСМ информираат дека во тек се распити на дел од осомничените и дека во текот на денот ќе бидат соопштени повеќе детали од описот на дејствијата и предложените мерки.
Полицијата изутринава вршеше претреси во домовите на поранешниот вицепремиер Артан Груби и порашениот директор на Лотарија, Перпарим Бајрами, а како што објавија дел од медиумите, претреси се извршени на повеќе локации во врска со криминал сторен во Државна лотарија.
При претресите, како што јавуваат медумите, и Груби и Бајрами не се пронајдени во нивните домови.
Поранешниот вицепремиер Груби, кој неодамна беше ставен на „црната листа“ на САД поради наводи за значителна корупција, доцна синоќа на Фејсбук објави дека е надвор од земјава во приватна посета.
– Денеска патував за приватна посета. Ве молам, немојте да измислувате и шпекулирате. Редовно патував со моите патни исправи и за ова е известено и моето лично полициско обезбедување, напиша Груби во објавата.
Стејт департментот на САД на 9 декември соопшти дека воведува санкции против поранешниот заменик-претседател на Владата на Северна Македонија Артан Груби и судијата на Апелацискиот суд Енвер Беџети поради нивна вмешаност во значителна корупција.
