Европската комисија иницира три дополнителни технички истражни мерки за Икс, кои се однесуваат на системот за препораки на социјалната мрежа, како дел од формалната постапка отворена против платформата на 18 декември 2023 година врз основа на Законот за дигитални услуги (ДСА), соопшти денеска портпаролот на ЕК за технолошки суверенитет, одбрана, Вселената и истражување, Тома Рение.
– Прво, Комисијата бара од компанијата до 15 февруари 2025 година да обезбеди внатрешна документација за нејзините системи за препораки и сите неодамна направени промени, рече Рение.
Комисијата, исто така, бара информации за планираните промени во дизајнот и функционирањето на алгоритмите за препораки во периодот помеѓу 17 јануари 2025 и 31 декември 2025 година, како и пристап до техничкиот интерфејс што овозможуваат директно откривање факти за умереноста на содржината и виралноста на сметките.
– Овие мерки ќе им овозможат на службите на Комисијата да ги земат предвид сите релевантни факти при сложената проценка според ДСА за системските ризици и нивното ублажување, додаде Рение.
Во врска со ваквата одлука на Еврокомисијата, нејзината извршна потпретседателка за технолошки суверенитет, безбедност и демократија, Хена Виркунен изјави дека целта на овие „дополнителни чекори“ е да се расветли усогласеноста на системите за препораки на Икс со обврските утврдени со ДСА.
– Посветени сме да обезбедиме секоја платформа што работи во ЕУ да го почитува нашето законодавство, кое има за цел да ја направи онлајн сферата праведна, безбедна и демократска за сите европски граѓани, додаде Виркунен.
