Протестот во Крагуевац под слоганот „Да се сретнеме на Сретение“, на кој го повикаа српските студенти, влезе во шестиот час, а колони луѓе од повеќе правци се уште пристигнуваат во градот, јави Бета.
Блокирани се сите улици во поширокиот центар на градот. Исто така, голем метеж има и на патиштата кои водат кон Крагуевац.
Во паркот се подготвува храна за сите, менито е приспособено и за студентите и за граѓаните од Нови Пазар, а храната ја делат и актерите на Кнежевско-српскиот театар во Крагуевац, јавуваат репортерите на Бета.
Планирано е блокадата да трае 15 часа или до полноќ поради 15-те смртни случаи кои настанаа при уривање на настрешницата на железничката станица во Нови Сад на 1 ноември.
Од 11:52 до 12:07 часот беше молк од 15 минути, што ќе се повтори вечерва во 23:52 часот.
Насобраните носат транспаренти со натписи „Пумпај!“, „Насмевката се врати во градот“, „Дај ни го сонцето“, „Главни дизајнери на подобра иднина“, „СМАК на системот“…
Синоќа во Крагуевац пеш пристигнаа студенти од Нови Сад, Белград, Ниш Краљево, Нови Пазар, Ужице и Чачак за да им дадат поддршка на тамошните колеги.
И додека во Крагуевац се одржува еден од најголемите собири во изминатите 20 години, во Сремска Митровица во тек се подготовките за контрамитинг што ќе го одржи српскиот претседател Александар Вучиќ. Во самиот град беа забележани голем број автобуси со регистарски таблички од Босна и Херцеговина, јави ТВ Н1.
