Како научник, Остин Картер го истражува Антарктикот, па со оглед на тоа дека тоа е најмалку истражениот континент на Земјата, секоја новост оттаму предизвикува голема љубопитност кај научниците, но и кај следачите и јавноста. Така, неговото видео од длабочините на „Ледениот Континент“ собра речиси 22 милиони прегледи и повеќе од 2,6 милиони допаѓања на „Тик-ток“.
Картер, всушност, минал 75 дена на Антарктикот пред две години – тогаш како докторанд. Во тоа време, имено, ја објавил видеоснимката, но интернет-просторот сега повторно ја врати на светската интернет-сцена.
@austincarter642 travel to the bottom of the East Antarctic Ice Sheet #antarctica #ice #climatechange #sounds
Во видеото, Картер покажува дупка длабока 93 метри што тој и истражувачите од Центарот за истражување на прастар мраз (КОЛДЕКС) ја ископале во ледот на Антарктикот, во областа Алан Хилс – каде што е пронајден најстариот мраз на Земјата. Целта на истражувачите денес е да одат уште подлабоко, да стигнат до постарите слоеви мраз и така да добијат подобар увид во историјата на климатскиот систем на нашата планета.
Што може да се крие во такви ледени длабочини? Можните одговори вклучуваат фосили од непознати видови, ретки материи, па дури и потенцијално опасни бактерии и вируси коишто илјадници години биле заробени во мразот.
На снимката се гледа како камерата забрзува додека гравитацијата ја влече кон дното низ тој магичен леден тунел. На самото дно се наоѓа – уште снег, а под тој слој – карпа. До таа точка, всушност, запрело дупчењето.
Научниците проучуваат примероци од мраз од големите длабочини за подобро да го разберат климатското минато на Земјата. Со проучување на тие прастари ледени плочи, може да се добијат клучни податоци за климатските промени и условите на планетава пред милиони години.
