Поранешниот француски лекар Жоел Ле Скварнек, обвинет за силување или сексуално злоставување на 299 луѓе, пред судот изјави дека правeл „одвратни работи“ и дека е подготвен да преземе одговорност за нив.
„Правев одвратни работи. Целосно сум свесен дека овие рани ниту можат да зараснат, ниту да се избришат“, изјави Скварнек (74) на првиот ден од судењето, кое започна во понеделникот во францускиот град Ван, во провинцијата Бретања.
За време на четиридневното судење, Скварнек ќе се соочи со стотици свои жртви.
Доколку биде прогласен за виновен, му се заканува затворска казна до 20 години, покрај 15-годишната казна што веќе ја отслужува откако беше прогласен за виновен во 2020 година за силување дете.
За време на претресот во неговиот дом, откриени се повеќе од 300.000 фотографии, 650 видео фајлови со педофилска содржина, како и дневници во кои тој ги детализирал своите активности, покажуваат судските документи.
На судењето во Ван ќе бидат истражени случаите на силување што тој го извршил помеѓу 1989 и 2014 година против 158 момчиња и 141 девојче, кои во просек имале 11 години во времето на силувањето и злоупотребата.
