По повод Меѓународниот ден на жената, Платформата за родова еднаквост повикува на Марш за женски права, кој ќе се одржи на 8 март (сабота) во 13:00 часот пред Универзална сала во Скопје. Оваа година, маршот ќе се одржи под слоганот „Нека јадат ружи!“, испраќајќи силна порака за економска и социјална правда.
Организаторите нагласуваат дека 8 Март не е ден за симболични гестови, туку ден на активизам и борба за родова еднаквост. „Што ќе ни се ружи кога немаме за леб?“ – прашуваат тие, укажувајќи на економската несигурност и системската неправда што несразмерно ги погодува жените.
Бојкот како форма на протест
Оваа година, покрај марширањето, организаторите повикуваат и на економски и домашен бојкот. Жените се повикуваат на:
Бојкот на големите маркети, трговски ланци и шопинг центри, како реакција на економските политики и инфлацијата кои ја влошуваат нивната егзистенција.
Бојкот на домашните обврски, со цел да се потенцира вредноста на трудот што жените секојдневно го вложуваат во домот.
Маршот ќе заврши во Паркот Жена Борец
По почетното собирање пред Универзална сала, маршот ќе продолжи по предвидена рута низ градот, а завршните обраќања до јавноста и институциите ќе се одржат во Паркот Жена Борец.
Организаторите ги повикуваат сите кои се борат за слобода, солидарност и автономија да се приклучат на маршот и да дадат поддршка во борбата за родова еднаквост.
