По неколкумесечни рекордни протести во Србија, ЕУ конечно го прекина својот молк – нудејќи редок, но одмерен прекор до Белград.
„Земјата треба да ги исполни реформите на ЕУ, особено да преземе решителни чекори кон слободата на медиумите, борбата против корупцијата и изборните реформи“, напиша претседателката на Европската комисија Урсула фон дер Лајен синоќа на X по работната вечера со српскиот претседател Александар Вучиќ, пишува Политико.
На состанокот, на кој присуствуваше и претседателот на Советот, Антонио Коста, стана збор за актуелната политичка ситуација во Србија и нејзиниот пат кон пристапување во ЕУ. Тоа се случи во критичен момент за Вучиќ, кој не можеше да ги задуши студентските блокади и протести кои траат повеќе од четири месеци. Демонстрантите побараа одговорност од раководството на Србија за корупцијата и за ерозијата на демократските институции за време на мандатот на претседателот.
Во меѓувреме, ЕУ се сметаше за невообичаено претпазлива во однос на поддршката на протестите, додека работната вечера на Вучиќ со највисоките лидери на блокот предизвика контроверзии во и надвор од Србија. Минатата недела 32 европратеници во писмо побараа Фон дер Лајен да ја откаже средбата.
„Важно е Комисијата да се ангажира со Вучиќ“, рече словенечката европратеничка од Зелените, Ирена Јовева. „Но, пред да му даде платформа да ја користи дома за надреално шоу, ЕУ треба јасно да каже дека српските демонстранти ги бараат токму работите што ЕУ наводно ги сака од Србија, но не успеала да ги постигне“.
„ЕУ изгуби многу од кредибилитетот во последните години во Западен Балкан и сега е време конечно да се разбуди и радикално да ја смени политиката“, додаде Јовева.
Вучиќ, од своја страна, за државната телевизија РТС по вечерата изјави дека ги советувал своите колеги од ЕУ дека „Србија е апсолутно посветена на тој стратешки пат“ и дека „многу брзо ќе биде донесена одлука за формирање нова влада или одржување избори“.
Д. Т. / Цивил Медиа
