Триесет и четири годишен возач на патничко моторно возило што возел во алкохолизирана состојба со 1.57 промили алкохол во крвта, ја предизвикал сообраќајката на магистралниот пат А2, Крива Паланка – граничен премин со Република Бугарија, Деве Баир, поради што во текот на раните утрински часови сообраќајот беше во прекин.
Според информациите од Секторот за внатрешни работи Куманово, несреќата се случила нешто по 22 часот вчеравечер, додека лицето било лишено од слобода дваесет минути по полноќ.
-На 02.04.2025, дваесет минути по полноќ, полициски службеници од Одделението за внатрешни работи Крива Паланка го лишиле од слобода 34- годишниот М.П. од Крива Паланка, кој на 01 април 2025 во 22 часот и 10 минути на магистрален пат Крива Паланка – Деве Баир со товарно моторно возило „волво“ со скопски регистарски ознаки излетал од коловозот. М.П. се здобил со телесни повреди, констатирани во Здравствен дом во Крива Паланка, а било констатирано дека има 1,57 промили алкохол во крвта, информира портпаролот на СВР Куманово, Ивана Младеновска.
Од СВР Куманово известија дека против М.П ќе биде поднесена кривична пријава по член 297а од Кривичниот законик – „безобзирно управување со моторно возило“.
