Германското внатрешно разузнавање ја класифицираше крајнодесничарската партија „Алтернатива за Германија“ (АфД) како екстремистичка организација што ја загрозува демократијата. Со оваа одлука, објавена денеска, разузнавачката служба добива овластување за поинтензивно следење на партијата, која беше втора на последните сојузни избори во февруари.
„Концептот за народот, заснован на етничка припадност и потекло, што доминира во партијата, не е во согласност со слободниот демократски поредок. Оваа концепција има за цел да исклучи одредени групи од населението од рамноправно учество во општеството, да се однесува кон нив на начин што ја крши уставноста и да ги стави во подредена позиција“, се вели во образложението на германското разузнавање. АфД не ги признава германските граѓани со мигрантско потекло, особено муслиманите, за рамноправни претставници на германскиот народ, се додава во проценката. Овој пристап доведува до „клеветење и оцрнување“ на одредени лица и групи, предизвикувајќи „ирационални стравови и непријателство кон нив“.
Според министерката за внатрешни работи Нанси Фезер, АфД „докажано води кампања против слободниот демократски поредок“. „АфД застапува етничка концепција што дискриминира цели групи од населението и ги загрозува граѓаните со изјави што ги прикажуваат мигрантите како граѓани од втор ред“, изјави Фезер. Таа додаде дека ставот на партијата кон етничките групи е очигледен преку „расистичките изјави, особено против мигрантите и муслиманите“.
Одлуката е донесена неколку дена пред стапувањето на должност на новоизбраниот канцелар Фридрих Мерц од Христијанско-демократската унија (ЦДУ), во услови на жестоки дебати за тоа како да се постапува со АфД во новиот парламент. Според аналитичарите, одлуката може да ја зголеми поддршката за АфД и нејзините наративи, кои се отфрлаат од традиционалните партии. Неколку неодамнешни анкети покажуваат дека АфД е на прво место.
Некои фракции на АфД, како младинското крило, веќе беа прогласени за екстремистички, но партијата како целина досега беше класифицирана само како „потенцијално екстремистичка“ – одлука од 2021 година. Новиот статус им овозможува на властите полесно да користат тајни методи за надзор, како регрутирање информатори или пресретнување на комуникации. Привлекувањето нови членови за АфД може да стане потешко, бидејќи тие ќе се соочат со ограничувања при вработување во државната служба.
Шолц вели – Не треба да се избрзува со забраната на АфД
Германскиот канцелар Олаф Шолц изрази загриженост поради растечката сила на крајно десничарската партија Алтернатива за Германија (AфД), но предупреди и на опасноста од донесување избрзана одлука за забрана на партијата, јави ДПА.
На конгресот на Протестанската црква во Хановер, Шолц нагласи дека „не треба да се брза со процесот на забрана“ откако Сојузниот уставен суд ги отфрли неодамнешните барања за забрана на AфД, објави германски „Штерн“.
Шолц додаде дека класификацијата на АфД од страна на Сојузниот институт за заштита на Уставот е внимателно подготвена и дека „многу луѓе мора темелно да ги проучат документите“.
Канцеларот истакна дека подемот на АфД го погодува „длабоко“ како граѓанин и како политичар.
АфД на суд ќе ја оспорува класификацијата на германското разузнавање за партијата како „екстремистичка организација“
Копретседателите на Алтернатива за Германија (АфД) денеска изјавија дека партијата ќе преземе правни мерки против класификацијата на домашната разузнавачка служба за нив како „екстремистичка организација“, јавија британските медиуми.
„АфД јавно се дискредитира и се криминализира непосредно пред промената на власта“, напишаа во соопштението Алис Вајдел и Тино Крупала.
Двајцата копретседатели додаваат дека партијата „ќе продолжи правно да се брани од овие клеветнички наводи кои ја загрозуваат демократијата“.
Ј. Ѓ.
