Детскиот фонд на Обединетите нации (УНИЦЕФ) денеска ги критикуваше плановите за преземање на дистрибуцијата на хуманитарна помош во Газа, кои беа презентирани во четвртокот од Израел и САД, и предупреди дека тие ќе го влошат страдањето на децата и семејствата.
Меѓу хуманитарната заедница циркулира предлог за основање Хуманитарна фондација за Газа, која би дистрибуирала храна од четири „безбедни места за дистрибуција“, што потсетува на плановите што ги објави Израел претходно оваа недела, а кои предизвикаа критики дека наскоро ќе го влошат раселувањето на населението во Газа.
Американскиот Стејт департмент претходно изрази мислење дека решението што би овозможило испорака на помош во храна во Газа е „на хоризонтот“ и дека наскоро ќе биде објавено, пренесуваат британските медиуми.
-Се чини дека изгледот на планот што Израел и го презентираше на хуманитарната заедница веројатно ќе ги зголеми страдањата на децата и семејствата во Појасот Газа, изјави портпаролот на УНИЦЕФ, Џејмс Елдер.
Тој додаде дека неговите забелешки се однесуваат и на новата фондација, која ја разбира како дел од истиот широк план.
Хуманитарната заедница веќе ги отфрли сите планови што би ѝ дале на Израел улога во дистрибуцијата на помошта во Газа, наведуваат британските медиуми.
Меѓутоа, во документот на Фондацијата се наведува дека локациите ќе бидат „неутрални“, а американскиот амбасадор во Израел, Мајк Хакаби, денес изјави дека Израел нема да биде вклучен во дистрибуцијата на помошта.
Сепак, Елдер рече дека користењето на вакви центри, за кои фондацијата вели дека првично ќе им служат на 300.000 луѓе секој ден, би создало ризици за децата и семејствата додека бараат помош и би довело до понатамошно раселување.
-Користењето на хуманитарната помош како мамка за принудно раселување, особено од север кон југ, ќе создаде овој невозможен избор – избор помеѓу раселување и смрт, рече Елдер, кој бил на неколку мисии во Газа откако започна војната меѓу Израел и Хамас пред 19 месеци.
Според него, се чини дека таков план е смислен со цел да се зајакне контролата врз областите што се клучни за опстанок, со цел да се изврши притисок.
Наместо тоа, тој го повика Израел да ја укине блокадата за влегување на помош во енклавата, која трае повеќе од два месеци и поттикнува широко распространет глад и предизвикува загриженост за зголемување на смртните случаи поврзани со неухранетост.
-Постои едноставна алтернатива – укинување на блокадата и дозволување на хуманитарната помош да спаси животи, рече Елдер.
Израел од 2 март го забрани влезот на хуманитарна помош на палестинската територија, каде што води војна против милитантното палестинско движење Хамас.
