Апелацискиот суд во Токио ја поништи казната од 84 милијарди евра изречена против четворица поранешни директори на компанијата „Тепко“, оператор на нуклеарната централа Фукушима, која беше тешко оштетена во земјотресот и цунамито во 2011 година, јавуваат јапонски медиуми.
Во 2022 година, четворицата директори беа осудени на оваа рекордна казна во граѓанска постапка покрената од акционери, кои сметаат дека катастрофата можела да биде спречена ако раководството на „Тепко“ ги прифатело предупредувањата од научните студии и презело заштитни мерки, како поставување резервен извор на струја на повисока кота.
Обвинетите се бранеа дека ризиците биле непредвидливи и дека научните истражувања не биле сигурни.
Според снимки прикажани на телевизиите „Нипон ТВ“ и „НХК“, тужителите држат транспаренти со барање глобата да биде зголемена на 147 милијарди евра, со натпис: „Мора да се преземе одговорност за нуклеарната катастрофа во Фукушима“.
Оваа глоба се сметаше за највисока досега изречена во Јапонија и требаше да ги покрие трошоците за демонтажа на реакторите, обештетување на населението и расчистување на теренот.
Новинската агенција Џиџи прес објави дека судот ја отфрлил тезата дека катастрофата можела да се предвиди.
Минатата година, друг суд потврди ослободителна пресуда за двајца поранешни вработени на „Тепко“ обвинети за професионална небрежност.
Со оваа одлука се затвора единствениот кривичен процес за најтешката нуклеарна катастрофа во светот по Чернобил во 1986 година.
