Уште 42 лица, вклучувајќи го и градоначалникот на инстабулската општина Бејоглу, Инан Гунеј, беа приведени утрово во истрага за корупција во општина Истанбул, во која беа уапсени градоначалникот на Истанбул, Екрем Имамоглу, и неколку други високи функционери од главната опозициска Републиканска народна партија (ЏХП) на 19 март, објави ТРТ Хабер, пренесе МИА.
Според обвинението од страна на Главното јавно обвинителство на Истанбул, 35 лица се осомничени во истрагата во врска со финансиски измами во неколку општински компании. Во исто време, осомничени се и уште девет лица за кои е утврдено дека се дел од криминална организација вклучена во измами на социјалните медиуми.
Обвинителството издаде налози за апсење за вкупно 44 лица, а по двајца од нив сè уште се трага.
По првичните апсења во март, турските власти спроведоа неколку операции за притворање на вработени во Општина Истанбул и лица поврзани со нив, како резултат на што 103 лица се во притвор, а над 200 се под различни мерки на притвор, објави веб-страницата „Хаберлер“.
Екрем Имамоглу, кој се смета за најсериозен противник на претседателот Реџеп Тајип Ердоган, беше приведен на 19 март под обвинение за корупција. На 23 март, судот му го продолжи притворот, а неколку дена подоцна, Советот на Истанбулската општина го отстрани Имамоглу од функцијата. Притворањето на Имамоглу, кој ги негира обвиненијата, предизвика бран протести опишани како најголеми во Турција од 2013 година.
