Премиерот Христијан Мицкоски денеска присуствуваше на пуштањето во употреба на новата детска градинка „Сончогледи“ во Гевгелија, која, според најавите, ќе придонесе значително да се намали, а можеби и целосно да се елиминира листата на чекање за згрижување на деца во оваа општина, соопштуваат од Владата.
„Четврта градинка од почетокот на годината, а уште многу градинки кои се почнати кон крајот на 2024 и во текот на 2025 година, во периодот што следи ќе бидат привршени и ставени во функција“, изјави Мицкоски.
Премиерот нагласи дека голем дел од проблемите што во минатото ја забавувале реализацијата на ваквите проекти се надминати, а динамиката на изградба е значително засилена.
„Многу од проблемите кои во минатото ги пратеа овие проекти се отстранети, засилена е динамиката на реализација и изградба на објектите, но истовремено и примањето на нов, лиценциран кадар е интензивирано – нешто што во минатото беше закочено“, рече Мицкоски.
Тој истакна дека грижата за децата и семејствата останува еден од клучните приоритети на Владата.
„Наш приоритет како Влада е просемејната политика, грижата за најмилите, за најмладите, и таа продолжува и понатаму, затоа што на младите им припаѓа иднината, а ние сме тие што треба да ја направиме таа иднина поперспективна“, изјави премиерот.
Според него, ваквите инвестиции директно им го олеснуваат секојдневното функционирање на младите семејства.
„На овој начин, на голем број брачни парови им се олеснува начинот на функционирање, а истовремено тие се охрабруваат да се одлучат за дете повеќе“, додаде Мицкоски.
Премиерот посочи дека, според разговорите со локалното раководство, новата градинка ќе има конкретен ефект врз проблемот со недостиг на места.
„Со овој објект веќе нема да имаме листа на чекање овде во Гевгелија, или таа листа ќе биде многу мала“, рече тој.
Во завршницата, Мицкоски им честиташе на сите инволвирани во реализацијата на проектот.
„Му честитам на градоначалникот, на министерот и заменик-министерот во Министерството за социјална политика, демографија и млади, на пратеничката, советниците и администрацијата во Општина Гевгелија и посакувам уште многу вакви убави проекти со кои ќе додадеме квалитет во животите на гевгеличани“, изјави премиерот.
