Американскиот претседател Доналд Трамп телефонски разговарал со генералниот секретар на НАТО Марк Руте во врска со Гренланд.
– Се согласив на состанок на различните страни во Давос, Швајцарија. Како што им кажав на сите, многу јасно, Гренланд е императив за националната и светската безбедност. Нема враќање назад – за тоа сите се согласуваат! Соединетите Американски Држави се убедливо најмоќната земја на светот. Голем дел од причината за ова е обновата на нашата војска за време на мојот прв мандат, која продолжува со уште побрзо темпо. Ние сме единствената сила што може да обезбеди мир низ целиот свет – И тоа се прави, едноставно, преку сила!, напиша Трамп на Трут Соушл.
Претходно Трамп изјави дека го поканил својот руски колега Владимир Путин да се приклучи на неговата иницијатива за решавање на глобалните конфликти, наречена „Одбор за мир“.
Во врска со тензиите околу Гренланд, Трамп рече дека Данска не може да ја гарантира одбраната на островот, кој е нејзина автономна територија. Според него, за време на Светскиот економски форум во Давос, Швајцарија, што се одржува оваа недела, САД ќе разговараат за прашањето за преземање на Гренланд.
– Мораме да го имаме. Тие мора да го направат тоа. Тие не можат да го одбранат. Тие, Данците, се прекрасен народ. Ги познавам нивните лидери, тие се многу добри луѓе, но тие дури и не стапнуваат таму, изјави Трамп во Палм Бич на Флорида.
