Пратеничката група на Социјалдемократскиот сојуз на Македонија денеска во Собранието го поднесе предлог-Законот за изменување и дополнување на Законот за минимална плата, со кој се предлага зголемување на минималната плата на 600 евра, односно 36.960 денари.
Од СДСМ информираат дека предлог-законот е поднесен согласно потребите на работниците и барањата на синдикатите, со цел да се заштити животниот стандард на граѓаните и да се обезбеди достоинствен приход за оние што работат за минимална плата.
Во образложението на законот се наведува дека во текот на 2025 година е евидентиран континуиран пораст на инфлацијата, при што индексот на трошоците на живот бележи значително зголемување, особено кај основните прехранбени производи, енергенсите, комуналните услуги и здравствените трошоци, кои директно влијаат врз месечните трошоци на домаќинствата.
Според СДСМ, поскапувањата кај храната и основните животни намирници, како и растот на цените на електричната енергија, греењето и услугите, реално ја намалуваат куповната моќ на работниците, особено на оние што примаат минимална плата.
Овие состојби, како што се наведува, најсилно се одразуваат врз најранливите категории работници, кај кои минималната плата претставува единствен или доминантен извор на приходи.
Дополнително, синдикатите во континуитет укажуваат на потребата од дополнително зголемување на минималната плата, со цел ублажување на ефектите од инфлацијата, обезбедување достоинствен животен стандард и зголемување на социјалната сигурност на работниците и нивните семејства.
Финансиските импликации од предложените законски измени се проценуваат на околу 7,5 милијарди денари.
Од СДСМ порачуваат дека се на страната на работниците и очекуваат поддршка од сите парламентарни партии за усвојување на законот.
„Време е да обезбедиме достоинствена плата за работниците“, порачуваат од СДСМ.
