Американското Министерство за правда (DOJ) во петокот објави нова обемна серија документи поврзани со случајот на Џефри Епстин, меѓу кои и листа на пријави и предлози за истрага во кои се спомнува и американскиот претседател Доналд Трамп.
Во еден од документите се наоѓа список на, како што наведува Министерството за правда, „непроверени и неутврдени наводи“ против Трамп. Документот накратко беше отстранет од официјалната веб-страница, но американски новинари успеале да направат и зачуваат снимки од екранот. Набргу потоа, документите повторно беа објавени и во моментот се достапни на страницата на Министерството.
Материјалите потекнуваат од интерна комуникација и табели на Федералното истражно биро (ФБИ), поточно од одделот за детска експлоатација и трговија со луѓе, од август 2025 година. Во нив се сумирани пријави примени преку Националниот центар за дојави (NTOC). Во табелите, покрај описот на секоја пријава, е наведена и реакцијата на ФБИ, како обид за контакт, процена на веродостојноста или препраќање на случајот до други канцеларии.
Во повеќе пријави, Трамп се доведува во врска со кругот околу Епстин и Гислејн Максвел, со тврдења за сексуално злоставување, забави со млади девојки и наводна трговија со луѓе. Во документите јасно се наведува дека дел од информациите се добиени посредно, а во многу случаи е запишано дека не постојат проверливи докази.
Наводите што го спомнуваат Трамп
Една од пријавите зборува за „неидентификувана пријателка“ која наводно пред околу 35 години во Њу Џерси била присилена на орален секс со Трамп, а истата личност, според пријавата, била злоставувана и од Епстин, пишува Index.hr.
Во друга пријава, подносителката тврди дека како 13-годишно девојче во 1984 година била присилена на сексуални дејствија со Трамп и дека тој бил присутен при наводното убиство на нејзиното новороденче. Во белешките на ФБИ е наведено дека не бил воспоставен контакт со наводната жртва или дека нема проверливи информации.
Еден документ опишува и настан од 1987 година, во кој пријателка на подносителката завршила во хотелот Trump Plaza, испила пијалак што ѝ го дал непознат маж и подоцна се разбудила гола и со болки. Таа тврдела дека „видела блесок од лицето на Трамп“. Во документот стои дека идентитетот на жртвата не е потврден и дека не се добиени дополнителни докази.
Забави, наводни „оргии“ и мрежи
Во повеќе пријави се спомнуваат забави на Епстин во Њујорк и Флорида, со тврдења за „големи оргии“ со млади девојки и постари мажи, при што името на Трамп се наведува меѓу присутните.
Една онлајн пријава опишува наводен ланец на сексуална трговија на голф-теренот на Трамп во Ранчо Палос Вердес во средината на 1990-тите години, со тврдења дека Трамп учествувал на забави и дека некои девојки „исчезнале“. Истата личност тврди и дека добила закани од шефот на обезбедувањето на Трамп.
Други пријави се однесуваат на забави во Мар-а-Лаго и содржат тврдења дека Трамп канел девојки на такви собири. Во една од најтешките обвинувања се опишува наводен формат на забави во стил „calendar girls“ во Мар-а-Лаго, со екстремни тврдења за злоставување малолетнички. Во белешките на ФБИ нема потврда за овие наводи.
Споменати и други јавни личности
Во исказите на подносителите повремено се појавуваат и имиња на други јавни личности, меѓу кои поранешниот американски претседател Бил Клинтон и милијардерот Илон Маск. Во документите изречно се наведува дека дел од тие тврдења се од втора рака.
ФБИ-материјалите не претставуваат обвиненија или судски утврдувања, туку збир на интерни резимеа на дојави, кои вклучуваат директни искази, посредни тврдења и непроверени обвинувања. Во делот што се однесува на Трамп, документите содржат серија тешки наводи, но истовремено покажуваат дека во најголем број случаи ФБИ заклучил дека нема доволно проверливи информации за понатамошно постапување или дека не бил воспоставен контакт со подносителите.
Реакцијата на Министерството за правда
Министерството за правда на САД веднаш реагираше на објавените обвинувања, наведувајќи дека јавноста добила сè што било доставено до FBI.
„Оваа објава може да содржи лажни или фалсификувани слики, документи или видеа, бидејќи согласно законот е објавено сè што јавноста му го доставила на ФБИ. Дел од документите содржат невистинити и сензационалистички тврдења против претседателот Трамп, доставени непосредно пред изборите во 2020 година. Да бидеме јасни, тие тврдења се неосновани и лажни. Доколку имаше и трошка веродостојност, тие сигурно ќе беа искористени против претседателот Трамп“, соопштија од Министерството во одговор за весникот The Guardian.
Поради делумно редигирани документи, не е можно со сигурност да се провери тврдењето на Министерството за правда во однос на времето кога биле поднесени пријавите. Станува збор за серија електронски пораки со снимки од екранот на друг документ, во кој се сумирани изјави на лица кои некој во ФБИ ги означил како „обвинители на Трамп“.
Електронските пораки биле испратени во август 2020 година, три месеци пред претседателските избори на кои Трамп загуби. Сепак, имињата на подносителите и податоците за тоа кога пријавите првично биле доставени до ФБИ не се објавени, па не може со сигурност да се утврди кога точно биле изнесени обвинувањата.
Претходни извештаи покажале дека најмалку една жртва на Епстин уште во 1996 година го пријавила до ФБИ тврдењето дека Епстин и Гислејн Максвел сексуално ја злоставувале нејзината 16-годишна сестра.
Ј. Ѓ.
