Поранешниот британски принц Ендру Маунтбатен-Виндзор бил иселен од својата долгогодишна резиденција „Ројал Лоџ“ во Виндзор во текот на ноќта, во услови на засилен притисок поради новите откритија поврзани со аферата со Џефри Епстајн, објави Daily Mail, повикувајќи се на извори од кралското семејство.
Според истите извори, иселувањето било „набрзина организирано и изведено под радар“, при што персоналот на резиденцијата бил оставен да ги спакува преостанатите лични работи на Ендру. Тој бил пренесен со автомобил во Норфолк, каде привремено ќе престојува во објектот „Вуд Фарм“ во рамки на имотот Сандрингам.
Одлуката, како што наведува Daily Mail, била донесена во неделата навечер, по итен разговор меѓу Крал Чарлс Трети и Принцот Вилијам, одржан токму во Сандрингам.
Британските медиуми наведуваат дека еден од клучните фактори за ваквиот потег е фактот што едно од лицата осомничени во рамки на новите истраги поврзани со Џефри Епстајн повторно го вратило фокусот врз улогата и статусот на поранешниот принц Ендру, што предизвикало сериозна загриженост во Бакингемската палата.
Во октомври минатата година официјално беше соопштено дека му е врачено известување за раскинување на закупот за „Ројал Лоџ“, а кралот Чарлс Трети тогаш иницираше и формална постапка за одземање на титулите „принц“ и „војвода од Јорк“. Од палатата тогаш соопштија дека мерките се неопходни, и покрај тоа што Ендру ги негира сите обвинувања против него.
Според извори блиски до кралското семејство, поранешниот принц има тешкотии да ја прифати реалноста и фактот дека повеќе не ужива кралски статус, што, како што велат, дополнително го влошувало јавниот впечаток додека тој сè уште живеел во луксузната резиденција.
Иако британската јавност беше информирана дека трајно ќе се пресели во „Марш Фарм“ по завршување на реновирањето, дел од аналитичарите и кралски биографи не ја исклучуваат можноста Ендру да замине и надвор од Велика Британија, со оглед на тежината на актуелните скандали.
Бакингемската палата засега не одговори на барањата за официјален коментар.
