„Помина цела недела, Владата не презема никакви мерки за намалување на цените на горивата“, соопштија од СДСМ, обвинувајќи ја Владата предводена од Христијан Мицкоски дека не реагира на растот на цените.
Во соопштението се наведува дека поскапувањето на горивата веќе има директни последици врз цените на основните производи. Според партијата, притисокот од новите цени веќе се чувствува во маркетите, при што како пример се наведува дека „цената на маслото за јадење надмина 100 денари“.
Од СДСМ прашуваат дали Владата намерно не реагира поради приходите од даноците или, како што наведуваат, станува збор за „неспособност“.
Партијата соопшти дека веќе предложила пакет мерки за ублажување на растот на цените. Во нив спаѓа намалување на ДДВ за горивата од 18 на 5 проценти, намалување на акцизата за четири денари, како и намалување на ДДВ за основните прехранбени производи.
„Овие мерки долгорочно ќе ги намалат цените и ќе им помогнат на граѓаните“, се наведува во реакцијата, со повик Владата веднаш да ги примени.
Според пресметките што ги изнесува СДСМ, „само со покачувањето на цената на дизелот за 14 денари, македонските граѓани оваа недела платиле околу три милиони евра повеќе“.
Во соопштението се предупредува и на можност за нов раст на цените на горивата. Партијата посочува дека, доколку војната во Иран потрае три месеци, цената на нафтата би можела да достигне меѓу 150 и 160 долари за барел, што би било речиси двојно повеќе од сегашното ниво.
Од СДСМ сметаат дека доколку не се воведе модел за ограничување на растот на цените, поскапувањата ќе продолжат и подоцна ќе биде тешко тие повторно да се намалат, дури и ако се стабилизира цената на нафтата.
Во реакцијата се наведува дека Владата „воопшто не се грижи за стандардот на граѓаните“, а се посочува и дека, според СДСМ, се одбиваат мерки за намалување на цените и за зголемување на минималната плата.
„Работниците се на улица затоа што се борат за корка леб, а власта наместо решенија ги навредува, понижува и омаловажува“, се наведува во соопштението.
