„Македонскиот јазик денеска е загрозен од владата на Мицкоски“ – изјави пратеничката Бисера Костадиновска Стојчевска на денешната прес-конференција на СДСМ, најавувајќи дека партијата ќе поднесе барање за надзорна расправа за примената на Законот за употреба на македонскиот јазик.
„Законот постои, но не се спроведува“
Од СДСМ велат дека иако Законот за употреба на македонскиот јазик е донесен во јануари 2024 година со широк консензус, неговата примена практично изостанува.
Според Костадиновска Стојчевска, во моментов постои именувана директорка на Инспекторатот и работна верзија на стратегија, но институцијата не функционира. Таа посочи дека нема вработени, нема лектори и дека употребата на македонскиот јазик не се почитува ниту на јавни настани.
Дополнително, како што беше нагласено, не постои ниту функционален механизам што би постапил доколку се поднесе пријава за непочитување на законот.
Буџетски кратења наместо имплементација
Од СДСМ обвинија дека наместо да се обезбедат средства за спроведување на законот, во буџетите од 2024 година наваму има кратења.
„Нема пари за примена на Законот за македонски јазик, ама има за тендери“, изјави Костадиновска Стојчевска, додавајќи дека со секој ребаланс дополнително се намалуваат средствата за оваа намена.
Барање за надзорна расправа
Пратеничката група на СДСМ и коалицијата поднесува барање за надзорна расправа во Собранието, со цел да се утврди состојбата и да се обезбеди спроведување на законот.
„Го поднесуваме ова барање за да се најде решение и конечно законското решение да почне да функционира“, беше истакнато на прес-конференцијата.
Политичка порака и повик до пратениците
Во своето обраќање, Костадиновска Стојчевска истакна дека СДСМ, како што рече, ја штити Македонија преку членството во НАТО и заложбите за интеграција во Европската унија.
Таа ги повика сите пратеници да го поддржат барањето за надзорна расправа, нагласувајќи дека станува збор за прашање од национален интерес.
