Владата во моментов е целосно фокусирана на спроведување реформи и консолидирање на државата, а следните парламентарни избори ќе се одржат во нивниот редовен термин во пролетта 2028 година. Ова доаѓа како појаснување на вчерашната најава дека набрзо ќе има избори, при што беше посочено дека кај многумина на политичката сцена веќе се појавил страв од таквото сценарио, одговарајќи на новинарско прашање изјави денеска премиерот Христијан Мицкоски, пренесуваат владините служби.
Премиерот истакна дека внимателно ги следи реакциите во јавноста и забележал дека одредени политички партии се исплашиле од можноста за предвремено соочување. Сепак, тој децидно потенцираше дека оваа година нема да има изборен процес, туку истата ќе биде посветена исклучиво на реформски процеси.
„Има некои од партиите коишто се исплашија од таа изјава, јас следам. Но, мојот став вие го знаете. Мојот став е дека оваа година избори нема, оваа година е реформска и година на консолидирање. Јас би сакал да имаме редовни избори кои ќе се случат наскоро во пролетта 2028 година“, појасни Мицкоски во својата изјава.
Запрашан дали евентуално 2027 година останува отворена како опција за излез на гласање, тој порача дека ВМРО-ДПМНЕ е секогаш подготвено да оди на избори и да победи. Но, нагласи дека сегашниот апсолутен приоритет на Владата е да ги испорача потребните реформи и да ја зголеми економската активност, со крајна цел да се зголеми животниот стандард на граѓаните.
