Синдикатот на културата соопшти дека остварил работна средба со министерот за култура и туризам Седат Сулејмани, на која било договорено формирање две заеднички работни групи за прашања поврзани со Колективниот договор и Законот за култура.
Од СКРМ средбата ја оценија како важен чекор кон обновување на социјалниот дијалог, по, како што наведуваат, две години во кои нивните барања и забелешки не биле соодветно разгледувани.
Првата работна група ќе се занимава со Колективниот договор за култура, кој е во постапка пред Уставниот суд, додека втората ќе работи на Законот за култура. Од Синдикатот најавија дека активно ќе учествуваат во подготовката на законските решенија, со цел тие да ги одразуваат потребите и правата на вработените во културата.
На средбата биле отворени и повеќе прашања кои подолг период ги засегаат културните работници. Меѓу нив е исплатата на стручните звања во дејноста заштита, за која СКРМ тврди дека во претходниот период се спроведувала селективно.
Синдикатот побара правата што произлегуваат од работниот однос да се применуваат еднакво за сите вработени кои ги исполнуваат законските и професионалните услови, без да зависат од поединечни или селективни одлуки.
Се разговарало и за унапредувањата во театарската дејност. Според СКРМ, дел од вработените, особено актерите, со години не биле унапредувани, додека во одредени случаи поединци биле унапредувани повеќепати во повисока група.
Од Синдикатот побараа да се воспостават еднакви критериуми, транспарентност и правичност во постапките за унапредување на сите вработени во културата.
Меѓу темите на средбата бил и бенефицираниот стаж на балетските уметници. СКРМ посочува дека ова прашање бара системско решение поради специфичноста и физичката тежина на балетската професија.
Според Синдикатот, позитивниот однос на министерот кон отворените прашања остава простор договорениот дијалог да резултира со конкретни решенија.
„Правата на културните работници не треба да бидат предмет на дневна политика, селективно толкување или празни ветувања. Културата не ја создаваат институциите на хартија, туку луѓето што работат во неа“, порачаа од СКРМ.
