Судската власт демантира уште една од низата теории на заговор на ВМРО-ДПМНЕ и нивниот претседател Христијан Мицкоски, кои се нивна алатка за напад врз судската и извршната власт. Неколку денови по ред, партијата на Мицкоски и неговите функционери ја бомбардираа јавноста со теории на заговор дека премиерот Зоран Заев преку наводна контрола врз судската власт, ќе ја спаси Катица Јанева.
Антонио Милошоски и целата партија, неколку пати најавија дека, наводно, Заев вршел влијание за да се пушти Катица Јанева од притвор и сето тоа во договор со судството и обвинителството. Но, на крајот, иако постоеле правни и законски можности, па дури и парична гаранција, иако сите основи беа елиминирани, судот, сепак, ја остави Јанева во притвор, а со тоа паднаа во вода сите тапани на ДПМНЕ.
Судија на претходна постапка ја одби понудената гаранција од Катица Јанева за укинување на притворот, а одлуката е донесена откако Обвинителството за гонење на организиран криминал дало негативно мислење. Со ова се докажа дека ниту судот, ниту обвинителството, не примиле и не спроведувале никакви и ничии наредби.
„По разгледување и ценење на предлогот и мислењето од надлежното обвинителство, судија на претходна постапка донесе решение со кое предлогот за укинување на мерката притвор со определена гаранција се отфрла како недозволен, а предлогот за определување мерки за претпазливост се одбива како неоснован“, известуваа од Кривичниот суд.
Одлуката на судот е донесена иако, според адвокатката на Јанева, Ирена Фрчковска, веќе нема основи заради кои беше донесена првичната одлука за притвор.
„Отпаднати се основите за определување мерка притвор и целта може да се постигне и со друга мерка, не мора да се оди со најстрогата по закон. Сметаме дека основите се отпаднати со самото нејзино разрежување од СЈО и од ОЈО Гевгелија“, изјави Фрчковска.
Како гаранција биле понудени становите на ќерката и синот на Катица Јанева во вредност од околу 160 илјади евра, како и уште еден стан што е во сопственост на човек од нејзиното потесно семејство.
Арбен Зеќири
