– Не секогаш оној кој се стекнува со имот, го става имотот на свои име. Ќе бараме од новите пратеници да донесат Закон за потекло на имотот, вели претседателката на Акнтикорупциска, Билјана Ивановска во интервју за Слободен печат.
„Во анкетните листови пратениците треба да ја наведат целокупната имотна состојба со која располагаат, но исто така треба да пополнат и листови за судир на интереси. Со новиот Закон за спречување на корупција и судир на интереси, ние бевме обврзани да направиме нов образец. Според содржината образецот го дотеравме, го направивме, но, електронското решение сеуште не е готово. Проектот кој што беше поддржан од УСАИД е повлечен и некако сами до крај треба да го избуткаме ова ново решение за анкетните листови. Мислам дека многу скоро, веќе наредната недела ќе го објавиме тендерот за подготовка на електронски софтвер за анкетните листови кој ќе ни овозможи историски да следиме што се случувало во промена на имотната состојба на избраните лица. Дел од овој софтвер ќе биде и регистарот на службените лица и затоа даваме приоритет во нашата работа. Очекувам до крајот на годината да се подготви овој софтвер и да се стави во тест употреба“, изјави Ивановска
На прашање дали пратениците ќе мораат анкетните листови да ги пополнуваат на начинот на кој претходно го правеле тоа, Ивановска вели дека и овојпат, анкетните листови пратениците и новоизбраните функционери ќе ги пополнуваат според старата содржина за која има утврдено недоследности, пропусти и слабости и нема да можат да го направат тоа според новата содржина и процедура која веќе ДКСК ја подготвила од април минатата година.
„Ќе мора да ги донесат лично во нашата институција или да ги испратат по пошта. Софтверот до сега требаше да биде функционален но се случија многу работи кои тоа го оневозможија“, вели Ивановска.
Целото интервју може да го прочитате ТУКА
