Кумановскиот театар ги покани кумановци в сабота во 20 часот да ја проследат претставата „Телефонот на мртовецот“ во која игра актерката Александра Пешевска. Таа годинава ја доби наградата за најдобро актерско остварување на фестивалот на камерен театар „Ристо Шишков“ во Струмица.
Пешевска на денешната прес-конференција рече дека ова е деветта претстава на која работи со режисерот Александар Ивановски, а улогата колку и да е тешка, толку се помни и остава впечаток и кај публиката и кај актерот.
– Да ги поканам да ја проследат претставата и ликот кој е награден на фестивалот да дојдат во кумановскиот театар. Улогата на Џин бараше исклучителен напор, но чувството уште кога ја подготвувавме беше истовремено убаво. Ова е деветта претстава на која работам со режисерот Александар Ивановски и точно знаев дека ќе биде габаритна улогата, но колку и да е тешка, толку повеќе ја помниш и повеќе остава впечаток и кај публиката и кај актерот. Беше големо задоволство да се работи и со режисерот и екипата, рече Пешевска. Актерката работи од студентски денови и има играно во преку педесетина претстави, претежно главни улоги.
Режисерот Ивановски на денешната прес-конференција кажа дека со Пешевска соработувале уште од студентски денови, нагласувајќи дека ова е првпат актер со кој соработува да добие високо признание-најдобро актерско остварување.
– Годинава сосема заслужено, зборувам со целиот интегритет од процесот на работа и неколкуте изведби пред кумановската публика, тоа место меѓу лауреатите ѝ припадна на Александра, актерка, која целата кариера ја поминува во кумановскиот театар и има креации кои се завидно, професионално, театарско ниво, рече Ивановски.
За кумановскиот театар, режисерот рече дека е задоволство да се работи, бидејќи актерите истражуваат, вклучително и со Пешевска за која рече дека е искрена кон публиката.
Претставата во Куманово беше изведена во февруари годинава. Драмскиот текст „Телефонот на мртовецот“ претставува свет во кој дискретниот хуманизам се распаѓа, дури и смртта ја губи својата конечност, се замаглува границата на тоа кој е мртов, кој е жив. Покрај Пешевска во оваа претстава играат и Кети Дончевска Илиќ, Горан Илиќ, Марко Трајковиќ, Александра Михајловска, Владанка Димковска.
