Претседателот Стево Пендаровски, по повод 28 Септември, Меѓународниот ден на Бошњаците, денеска упати честитка до припадниците на бошњачката заедница во Република Северна Македонија.
– Заедно со останатите етнички заедници и бошњачката искрено и неуморно го дава својот придонес во сите сфери на општествениот, економскиот и културниот живот во нашата земја, придонесувајќи во градењето на едно општество за сите. Горди сме што почитта, заедништвото и уважувањето на различностите се силата на нашата заедничка татковина. И понатаму како држава ќе продолжиме со исполнување на највисоките стандарди во заштитата на етничкиот, јазичниот и верскиот идентитет на сите наши граѓани и посветено ќе работиме на негување и промоција на бошњачката култура и традиција, се вели во честитката.
Претседателот Пендаровски, покрај желбите за добро здравје, успех и благосостојба, апелира да бидеме солидарни и одговорни во справувањето со Ковид-19.
-Би сакал да ја искористам оваа можност и да апелирам во период кога се очекува вториот бран од пандемијата со Ковид-19 да останеме сплотени, солидарни и одговорни и да се заштитиме себеси, најблиските и целата заедница. Верувам дека и од оваа битка, која ја води целото човештво, ќе излеземе како победници и набргу ќе се вратиме на нормалното секојдневие, мотивирани заеднички да работиме за демократска, модерна и просперитетна Република Северна Македонија, се наведува во честитката од претседателот Пендаровски.
