– За прв пат во нашата земја ќе се одржи дигитален конгрес на СДСМ, на 25 ти октомври, в недела, соопшти на денешната прес-конференција генералниот секретар на СДСМ, Љупчо Николовски и додаде дека тоа ќе го направи најсилната, најдинамична и најотворена демократска партија – СДСМ.
Тој нагласи дека согласно новата нормалност, СДСМ се грижи за здравјето на граѓаните, но и на делегатите, гостите, и медиумските работници.
„На овој дигитален Конгрес ќе биде даден отчет за досега сработеното, со осврт на изборниот резултат, победата на парламентарните избори и визијата за следниот 4 годишен мандат, даден од граѓаните.
Како современа партија која постојано се менува, ќе разговараме за измени и дополнувања на Статутот на СДСМ, за уште поголема демократизација на партијата.
За зголемување на директната внатрепартиска демократија, зајакнување на положбата и учеството на жените и младите и процесите на одлучување.
Етичка одговорност на сите членови на СДСМ, согласно највисоките меѓународни стандарди и практики, се наши заложби кои ќе ги канализираме на соодветен начин.
Со предлог измените за прв пат во историјата на Република Северна Македонија СДСМ ќе спроведе директен избор на Претседател на партија. Членовите лично ќе гласаат на слободни, непосредни, фер и демократски внатре-партиски избори.
Најавувам и други измени согласно меѓународните стандарди на социјал-демократијата како што доликува на една прогресивна партија како СДСМ.
Преку низа конкретни примери СДСМ покажа дека знае да се менува на подобро, во интерес на граѓаните, во интерес на државата, во интерес на демократијата.
Тој процес го продолжуваме заедно. Продолжуваме да работиме посветено за да биде уште подобро за сите.“, рече Николовски
