Информација за вклучување на училишта во иницијативата за саморефлексија при користење на дигитална технологија во образовниот процес – употреба на алатката SELFIE е усвоена денеска на седница на редовната седница на Владата.
Алатката веќе се употребува во 35 земји низ светот и е изработена од Заедничкиот истражувачки центар при Европската комисија (Joint Research Centre – JRC).
Називот на алатката SELFIE е всушност кратенка од Self-reflection on Effective Learning by Fostering the use of Innovative Educational Technologies и е дизајнирана да ги имплементира дигиталните технологии во процесот на учење, предавање и оценување.
Со помош на истата, може да се забележат што напредува добро, каде се потребни исправки и развој и кои треба да бидат приоритетите. Во моментов, алатката е преведена на 24 јазици на земји-членки на ЕУ.
Со помош на SELFIE, анонимно се врши преглед на тоа како учениците, наставниците и претопставените на училиштата ја користат технологијата. Самата алатка ги покрива раководењето, инфраструктурата, работата на наставниците/професорите, како и дигиталната способност на учениците.
Оценувањето трае 30 минути. Прашањата се поделени во групи. На пример, учениците си бираат прашања според она што го изучуваат, наставниците според она што го предаваат и според нивната практична настава, а претпоставените ги пишуваат плановите и целосната стратегија. Според ова, SELFIE ќе генерира извештај.
Бенефитите од оваа алатка се тоа што е бесплатна, го вклучува целиот образовен систем и ги детектира слабостите.
Министерството за образование и наука треба да достави информација за процесот на пилотирање и планот за примена на национално ниво на SELFIE алатката до крајот на октомври годинава.
На владината седница е усвоена и Информација за вклучување на Меѓународната организација на трудот и дополнување на Меморандумот за соработка за обезбедување ефикасна и координирана соработка во спроведување на заедничка медиумска кампања за промовирање на стручните занимања и можностите за стручно образование во земјава во периодот до 2021 година.
Извор: МИА
