Министерката за финансии Нина Ангеловска и извршниот директор на Холандската конституенца на Меѓународниот монетарен фонд и Светска банка Кун Давидсе, на нивната прва официјална средба што се одржа во Њујорк, оцениле дека рамката за соработка со Светска банка 2019-2023 се одвива со одлична динамика.
Според министерката Ангеловска, со реализацијата на проектите предвидени од четиригодишната Рамка за соработка во вредност од 420 милиони долари, ќе се инвестира во подобрување на конкурентноста на приватниот сектор преку инвестиции во инфраструктурата, развој на човечкиот потенцијал и поголема инклузија, како и во зајакнувањето на менаџирањето со јавните финансии и поголемата одржливост на енергетските извори.
„За нас, партнерството со Светска банка и поддршката што ни ја дава во развојот на нашата земја и нашиот пат кон ЕУ и НАТО, е од големо значење. Само со јасна стратегија и цел можеме на граѓаните да им понудиме подобри услови за живот, а Рамката за соработка е одлична основа за тоа“, истакнала Ангеловска.
Извршниот директор на Холандската конституенца посочил дека земјата ја има неговата поддршка за што побрза имплементација на Рамката за соработка, а изразил и верба во капацитетите за нејзино спроведување.
Тој оценил дека Република Северна Македонија се движи во вистинска насока гледајќи го економскиот раст, намалувањето на невработеностa и останатите економски параметри кои укажуваат на стабилна клима за инвестирање.
Давидсе, како што информира Министерството за финансии, и ја честитал новостекнатата титула „жена на дигитална трговија“ на министерката Ангеловска што таа ја доби во рамки на Годишното собрание на Обединетите нации. Воедно, истакнал дека го охрабрува фактот што во Република Северна Македонија се повеќе се гледа напор да се искористи потенцијалот на жените и дека ваквите заложби треба да продолжат бидејќи активната улога на жените на лидерски позиции е важна за раст на економиите.
На средбата се разговарало и за важноста на технологијата во сите процеси за прогресот на земјите. Од проектите кои треба да се реализираат од Рамката за соработка на средбата бил споменат проектот „Дигитална Македонија“ кој е во подготовка и ќе овозможи пристап до висококвалитетни широкопојасни услуги.
Првите проекти што ќе се спроведат од Рамката за соработка се проектот за изградба и рехабилитација на локални патишта, проектот за унапредување на земјоделството и проектот за модернизација на пензискиот сектор. Нивната реализација ќе почне на почетокот на следната година.
извор: МИА
Discussion about this post