Владата продолжува со етапното претставување на програмата за одбележување на 35-годишнината од независноста на државата, соопштуваат од Владата. Како дел од оваа замисла, портпаролката на Владата, Марија Митева, денеска од Градскиот парк во Струмица најави нов голем настан кој ќе се одржи на 16 август во овој град.
Според Владата, целта е јубилејот да не се слави само во главниот град, туку преку серија настани низ повеќе градови да им се овозможи на сите граѓани достоинствено и обединето да го одбележат овој значаен датум.
– Како Влада ветивме уште од самиот почеток дека ова ќе биде настан којшто ќе се случува во повеќе градови низ Македонија, сè со цел да дадеме повеќе достапност, да имаме повеќе единство и да размислуваме за тоа како достоинствено Македонија да ги одбележи 35 години независност – истакна Митева, изразувајќи увереност дека настанот на 16 август во Струмица ќе привлече посетители од целата земја.
Одговарајќи на новинарски прашања за временската рамка на празничните активности, владината портпаролка потсети дека празничната програма започнува на 2 Август со голем концерт во Битола, а во текот на целиот месец август ќе бидат ангажирани над 120 домашни уметници во повеќе градови.
Како дел од поширокиот концепт, за 1 септември е најавен концертот на светски познатиот тенор Хозе Карерас во придружба на македонски изведувачи, додека централната прослава ќе се одржи на самиот Ден на независноста, 8 Септември, со голем музички спектакл на Дејвид Гета на Градскиот стадион во Скопје.
