Францускиот претседател Емануел Макрон вечерва гостува кај Германската канцеларка Ангела Меркел во работна вечера каде меѓу другото ќе се разговара и за европските перспективи на Северна Македонија и Албанија. Средбата е закажана во 19 часот, известија од кабинетот на Макрон, а доаѓа во пресрет на Европскиот совет на 17 и 18 октомври во Брисел, на која освен за координација ќе се разговара и за заедничката седница на владите на двете земји што треба да се одржи во Тулуз.
Главни теми на вечерата ќе бидат Брегзит и заедничката седница на германската и француската Влада, како и барањето на Франција за пролонгирање на датумот за преговори за Северна Македонија и Албанија за првата половина од 2020 година, поради промена на методологија во пристапните процеси. Ставот на Франција за почеток на преговори на Северна Македонија со Европска Унија создаде вознемиреност, откако француски дипломати пред два дена најавија дека Франција е против сѐ додека не се усвои нова методологија за пристапни преговори за членство во ЕУ и одредувањето на датумот за Македонија да се одложи за март идната година. На вечерашната средба се известува дека канцеларката Меркел ќе ја искористи приликата да се убеди Париз да го смени ставот за блокирање на преговорите со Северна Македонија и Албанија.
Во моментов, најголем дел членки на Унијата го подржуваат почетокот на преговорите и сметаат дека, доколку тоа не се случи, ќе следи дестабилизација на регионот. Средбата ќе се одржува зад строго затворени врати, така што не се очекува исходот да биде познат набрзо.
За утре е свикан нов состанок на амбасадорите на ЕУ, како обид за постигнување консензус пред министерскиот Совет кој треба да заседава во вторник, во Луксембург, а каде клучниот збор ќе го има францускиот претседател Емануел Макрон.
А. Зеќири
