Фестивалот за литература за деца и илустрација „Литера“ распиша меѓународен конкурс за креирање на визуелниот идентитет на второто издание на фестивалот кое ќе се одржи во април, идната година. Ова е отворена покана, но и несекојдневна можност за сите илустратори од земјата и регионот да дадат свој придонес во создавањето на „Литера 2020“ чие прво издание предизвика голем интерес и позитивни реакции кај посетителите.
Авторот на избраната илустрација која ќе биде дел од официјалниот постер на фестивалот ќе има можност да го посети Саемот за литература за деца и илустрација во Болоња, кој ќе се одржи од 30 март до 2 април 2020 година и таму да го претстави своето портфолио.
Главната цел на Литера е популаризација на квалитетната детска литература и илустрација и подигнување на свеста за нејзината важност во целокупниот процес на раст и развој на децата.
„Фестивалот ги таргетира професионалците од оваа област, но и родителите и децата. За да изградиме квалитетно општество и публика за култура, треба да работиме на нејзино создавање уште од мали нозе. Квалитетна литература за деца е столб на емоционалната интелигенција кај најмладите. Токму тоа е еден од мотивите да продолжиме да го организираме Литера, вели Софија Семенпеева, организатор на фестивалот.
Првото издание на Литера се одржа во април годинава. На настанот гостуваа голем број автори од Македонија и од регионот и се одржаа повеќе изложби, работилници за деца и дебати за значењето на литературата во детскиот развој.
