Работничките од текстилна индустрија поддржани од невладината организација Гласен текстилец се охрабрија и денеска излегоа на протест со свои барања наспроти апсурдните на работодавачите. Преку протестот бараат подобри услови за работа, да запре мобингот и како што велат, заслужено покачување на минималната плата. Со транспатренти и пораки пред портите на некогашниот гигант „Астибо“ им порачаа на „газдите“ дека работниците се ничија сопственост.
Повод се барањата на текстилните газди, меѓу кои продолжување на работното време, укинување на празници за да нема дисконтинуитет во производството и замрзнување на придонесите.
Ова е веќе неопходно по скоро 30-годишната експлоатација и не вреднување на трудот! Се гледаме, стоеше во најавата за настанот.
„ Време е и работниците да се појават да го кренат својот глас и конечно да кажат дека условите во коишто работат, платата што ја земаат несоодвествува на нивниот труд. Триесет години беа робови, лоши услови за работа, со ниски плати, а наспроти тоа работодавачите бараат уште поголем скратување на нивните права. Денеска се собраа и еве да кажеме Стоп за нивните барања и да почнат повеќе да го ценат работникот и да им ја платат платат којашто ја заработуваат, вели Кристина Ампева од „Гласен Текстилец“.
Уранија Пировска од Хелсиншкиот комитет за човекови права вели дека последните четири години има поголема свесност кај работниците за да ги кажат своите проблеми, но и да си ги заштитат правата. Смета дека поддршката што им ја дале заедно со „Гласен Тестилец“ работите ги сменија на терен, а работниците станаа многу похрабри.
На барањата на Кластерот за текстил Хелсиншки комитет за човекови права регираше и претходно.
„Продолжување на работното време, укинување на празници за да нема дисконтинуитет во производството, замрзнување на придонесите, повторно отворање на темата за нормиран учинок, дури и небулозни закани за штрајк на работодавачи се крајно недозволиви изјави и барања на сопствениците на фабрики – членови на текстилниот кластер“, реагираа од Хелсиншкиот комитет за човекови права.
-Кај нас сега стигнуваат многу повеќе барања и претставки, пријавуваат кога им се прекршени правата. Мислам дека раздвижувањето им е забележително. Меѓутоа таа борба мора да биде уште поенергична од нивна страна. Ние секогаш ќе бидеме тука да им ја дадеме поддршката, но потребно е и тие самите таа битка да ја извојуваат и да бидат многу погласни, рече Пировска.
Оттаму потсетуваат дека до септември, до Комитетот се обратиле 1497 текстилни работнички од 60 конфекции од 12 различни градови.
Организаторите најавија дека ќе го радикализираат протестот во повеќе градови во земјава.
