Во „Македонското дерби“ од италијанското Калчо, што се играше на стадионот „Сан Паоло“ во Неапол, екипите на Наполи и Џенова изиграа без голови. Мечот од првата минута го почна и македонскиот репрезентативец Горан Пандев, а Елиф влезе во игра во 66 минута.
Играта беше бледа и под нивото на игрите на калчолигашите. После слабите игри последователно во неколку меча и проблемите во клубот на Наполи, можеби и не се очекуваше ништо повеќе, но она што ја шокираше фудбалската јавност секако е моментот кога во 66 минута при замена на капитенот Лоренцо Инсиње со македонскиот репрезентативец Елиф Елмас, Инсиње беше исвиркан од публика на „Сан Паоло“.
И Инсиње не им остана должен и со една непримерна гестикулација за капитен (ги поттикнуваше свирежите), го напушти теренот. Од друга страна пак, во 80 минута од натпреварот кога беше заменет Горан Пандев, како поранешен играч на Наполи, беше испратен со громогласен и долготраен аплауз од публиката во Неапол која со тоа му оддаде почит за неговите игри во дресот на Наполитанците.
Инаку Лоренцо Инсиње за игрите и фудбалското умеење на нашиот Елмас, во една прилика ќе рече:
За Елмас јас немав поим ни кој е, ни што е. Не знаев ама баш ништо. И кога го видов експресно ме импресионираше. Толку млад, а веќе игра зрело и има толку многу квалитети, што е фантастично.“
Со ова реми, Наполи е на седмата позиција во Калчо лигата со минус 12 бода од водечкиот Интер, а Џенова со само 9 бода моментално е на седумнаесетото место.
Останува прашањето дали екипата на Наполи ќе успее да ги надмине проблемите и ќе се соземе пред дуелот од Лигата на шампионите на Енфилд со екипата на Ливерпул што се игра после репрезентативната пауза.
Ј. Ѓорѓиоски
