Постигнат е договор со кофинансираните специјализанти, а приватните специјализанти – доктори на медицина од конкурсот 2019 ќе бидат платени за својата работа од февруари 2020 година, соопшти Министерството за здравство, пренесува МИА.
Министерот Венко Филипче, како што соопшти неговиот Кабинет, вчера и денеска остварил средби со приватните и со кофинансираните специјализанти.
Приватните специјализанти ги информирал дека ќе бидат платени за работата од февруари 2020 година, со што ќе бидат изедначени со статусот на нивните колеги кои првпат добија надоместок за својата работа во 2018 година.
Постигнат е договор и со кофинансираните специјализанти. Филипче на средбата со нив изјавил дека се пристапува кон измена во Законот за здравствена заштита согласно нивните барања. Со ова, оценил тој, се подобрува статусот и мотивацијата на кофинансираните специјализанти за натамошна работа.
