Хелсиншкиот комитет за човекови права ги поздравува напорите на Министерството за труд и социјална политика за реализација на заложбата да се деинституционализираат сите деца кои се сместени во нехумани услови и изолирана средина. Комитетот го поддржува доследното спроведување на реформата, која е започната уште пред петнаесетина години. Декларацијата за правото на детето и Конвенцијата за правото на детето, како и домашните закони кои ја регулираат детската заштита ги обврзуваат државните институции преку нивните мерки да се грижат за најдобрите интереси на детето. Но, грижата за нив, особено за оние кои се најзагрозени, е обврска на целото општество, велат од Хелсиншки комитет.
„Воспитно-социјалните проблеми на децата, кои од домот ,,Ранка Милановиќ’’ се преместуваат во мали групни домови, се производ на негрижа, насилство и занемарување со кое се соочиле уште на самиот почеток на нивниот живот. Тие деца заслужуваат шанса и поддршка за да растат и да се развиваат како останатите деца, а не дополнително да се стигматизираат и да се одвојуваат од општеството. Притоа, нагласуваме дека големите институции се надминат концепт за згрижување, кој има сериозни негативни ефекти врз развојот на децата и нивното оформување во возрасни личности. Апелираме до жителите на Визбегово да покажат емпатија, разбирање и прифаќање за децата кои се селат во нивната околина, во дом кој не е институција и кој наликува на семејна средина, а што е суштински предуслов за нивна социјализација и напредок. Со оглед на фактот што станува збор за мал групен дом, каде што би се сместиле најмногу три деца со константен надзор од воспитувачи, сметаме дека реакциите на граѓаните се неосновани и предимензионирани, а изјавите од типот ,,инјектирање на страно тело’’ се целосно неприфатливи и срамни. Никој нема право да ги дискриминира децата и најранливите“, нагласуваат од Хелсиншки.
Претходно, група населени во Визбегово реагираа на ваквата одлука на МТСП и ја повикаа Министерката за труд и социјална политика, Мила Царовска, да отстапи од ваквата одлука. Денеска по тој повод се одржа и мал протест.
Жителите на Визбегово се жалат дека во вечерните часови децата се шетаат по куќите и прават проблеми. Додаваат дека постојано им бараат цигари и алкохол, а правеле штета и врз недвижниот имот. Директорката на домот ги отфрла овие наводи на мештаните и вели дека три деца се згрижени во домот и не прават проблеми. Таа додава дека досега нема ниту една пријава кај нив, ниту во МВР за некакви проблеми направени од децата.
Трите деца утрово беа префрлени во друг дом, но повторно ќе бидат вратени.
Министерката за труд и социјална политика, Мила Царовска во однос на протестот на дел од жителите во Визбегово изјави дека е „навистина разочарана што во општеството сѐ уште се соочуваме со предрасуди, особено кога станува збор за деца“.
„Истовремено сум силно мотивирана да го завршиме процесот на деинституционализација, бидејќи наша заложба е да се грижиме за секое едно дете. Трите деца сместени во малиот групен дом во Визбегово за првпат добиваат топол дом и 24 часовна грижа од стручни лица. Да не заборавиме дека позади синтагмата „социјално-воспитни проблеми и нарушено поведение“ се крие дете со тежок, несреќен почеток во животот. Должност е на државата, но и на целото општество, на секој од нас да направиме сѐ за да ги поддржиме да се развијат во идни активни, продуктивни и среќни млади луѓе“, вели Царовска во својата реакција.
Се надевам, продолжи таа, дека разумот ќе преовлада и ќе се обединеме во заедничката цел – да обезбедиме топол дом и подобри услови за раст и развој за секое дете.
И.Т.З.
