Во базите Аин ал Асад и Ербил во моментот се наоѓаат повеќе десетици македонски граѓани кои работат во американската компанија КБР која обезбедува цивилна логистичка поддршка на армијата на САД. Според информациите до кои дојде Телма, никој од нив не е повреден иако се вознемирени по жестокиот напад од Иран врз двете американски бази.
Неколку часа пред нападот поради прогласена тревога од највисок степен, вработените во базите биле префрлени во бункерите кои служат како скривници пред евентуални воздушни или ракетни напади.
Нападот се случил околу 1:30 часот по локално време, но поради силината на употребените балистички ракети, експлозиите се почувствувале и внатре во скривниците.
Голем дел од вработените во двете бази се од Куманово. Дел од нив се подготвуваат за враќање дома или на одмор или поради прекин на работниот однос со фирмата КБР.
Во моментот нема тревога, а за транспорт кон Македонија се чека потполно смирување на состојбата бидејќи бомбардираната база Ербил служи како транзитен аеродром за припадниците на американската армија како и за вработените во воените бази.
Извор: ТЕЛМА
