Голем е интересот и многумина се јавуваат да прашаат што се случи вчера со инивијативата за архитектонско-урбанистички конкурс за Треска, известува Јана Белчева претседателка на Советот на Општина Центар.
„Вчерашната Седница на Советот на Општина Центар-Скопје беше следена со голем интерес од средствата за јавно информирање, иницијаторите, монитори од меѓународни институции и организации како и присутни граѓани. Со, тоа, можам да искажам лично задоволство дека уредувањето и планирањето на просторот во насока на повисок квалитет на живеење на граѓаните се наметнува како важна тема на интерес кај медиумите.
Во однос на конкретната граѓанска Иницијатива за уредување на просторот на поранешната фабрика Треска, засега со жалење можам да констатирам дека вчера не беше прифатена и се надевам дека тоа ќе се случи на продолжението на седницата.
Токму преку оваа иницијатива, Општина Центар има шанса да покаже дека комуникацијата со граѓаните и нивните интереси се од највисок приоритет на градските власти и дека договарањата, условно речено зад грб на граѓаните и давање приоритет на интересот на инвеститорите пред квалитетот на живот на граѓаните, ќе станува полека историја.
Жал ми е што некои од советниците времето и можност за дебата го искористија за пронаоѓање формални недостатоци на Иницијативата, наместо да се занимаваат со суштината, а тоа е да почне јавниот простор да се уредува по мерка и потреби на граѓаните.
Во таквиот пристап на партнерство со граѓаните и инвеститорите, каде квалитетот на живот, а не само профитот ќе биде идеја-водилка, може да преземеме примери од развиените земји кои успеале да преку таква синергија да направат урбани средини посакувани за квалитетен живот. Во спротивно, ќе покажеме немоќ пред клиентелизмот и корупцијата и ќе ги изневериме довербата и очекувањата на граѓаните за чиј интерес работиме.
Јас лично, додека го извршувам својот мандат, ќе се залагам и работам единствено на подобрување на квалитетот на живот за граѓаните. Мислам дека вештините, знаењето и комуникацијата се алатки кои треба ги употребиме за чесна цел за која сме избрани, да го подобруваме квалитетот на живот за сите, во конкретнава ситуација преку уредувањето на јавниот простор. Исто така, се надевам дека ваквите иницијативи на подадена рака на граѓаните и стручњаците во градење партнерство, се повеќе од добредојдени“, пишува Белчева.
