На само два дена пред почеток на судскиот процес (21 февруари) за организаторите на настаните од Собранието од 27 април 2017 година, група граѓани побараа од Основното јавно обвинителство за гонење на организиран криминал и корупција, да испита која е улогата на пратеникот од ВМРО-ДПМНЕ, Антонијо Милошоски во упадот во Собранието на 27 април.
Во барањето, граѓаните наведуваат дека сметаат оти сите виновни не се опфатени во судењето и дека треба да се земе предвид неодамнешната изјава на пратеникот Крсто Мукоски, кој од собраниската говорница во неделата рече дека токму пратеникот Антонијо Милошоски ја насочувал толпата низ Собранието.
„Не очекував дека со таков говор ќе почнете денеска, но овој е говор на еден криминалец кој знае дека еден ден ќе одговора. ВМРО-ДПМНЕ стана заложник на неколку криминалци како вас и партијата сте ја претвориле во Златна зора. А што се однесува до 27 април, ќе ви кажам неколку збора, Крсто Мукоски за таа несвесна грешка што ја направи си го одлежа своето. Жалам што такви како тебе, кои што ги упатуваа горе луѓето да го направат тоа што го направија, а ќе ве потсетам на една изјава што беше дадена од сведок кој што во моментов е во бегство, не го барајте Љубе Арнаудов, качете се горе, целта е Заев. Жалам што такви како тебе не одговараат“, изјави Мукоски од собраниската говорница во неделата (17-ти февруари) .
Граѓаните бараат од Обвинителството да го повика на распит и Крсто Мускоски ( за кого е знае дека ја отвори собраниската врата) , за да каже каква улога имал Милошоски за време на „крвавиот четврток“.
„Имајќи ја во предвид изјавата дадена од страна на пратеникот Крсто Мускоски, кој јавно посочува дека сега пријавеното лице Антонијо Милошоски од Скопје, насобраната толпа од граѓани ја упатувал да изврши ликвидација на Зоран Заев, може да се заклучи дека Милошоски јасно посочувал кој треба да биде ликвидиран, односно која е целта за влегувањето во Собранието“, пишува во претставката до која дојде „А1он“.
Поднoсителите на претставката бараат од Русковска проширување на истрагата за упадот во Собранието, со цел да се казнат сите сторители на кривични дела, бидејќи во спротивно, како што наведуваат, неказнетите ќе добијат поголема сила и ќе се сериозна закана за функционирање на правната држава.
Со претставката адресирана до ОЈО-ГОК се кривичен прогон против Антонијо Милошоски и Никола Груевски за сторено кривично дело терористичко загрозување на уставниот поредок.
Инаку, на 21 февруари, в петок, на обвинителна клупа во судница треба да седнат поранешниот претседател на Собранието Трајко Вељаноски, ексминистрите Миле Јанакиески и Спиро Ристовски и поранешниот директор на УБК, Владимир Атанасовски.
Во истрагата на Обвинителството за гонење на организираниот криминал и корупција беа опфатени и избеганиот експремиер Никола Груевски и ексразузнавачот Никола Бошкоски, но постапката за нив е запрена додека не станат достапни за македонските органи.
Минатата година беа донесени пресуди, меќу кои најмногу затворски казни.
Осудени беа: Митко Чавков – 18 години, Мунир Пепиќ – 15 години, Јане Ченто – 15 години, Игор Југ – 12 години, Митко Пешов – 15 години, Душко Лазаров – 15 години, Горан Јошевски – 15 години, Оливер Поповски – 13 години, Оливер Радулов – 10 години, Абдул Фета Алими – 7 години, Младен Додевски – 12 години, Горанчо Ангеловски – 12 години, Влатко Трајковски – 15 години, Вилијам Михајловски – 14 години, Никола Митревски-Кољо – 15 години, Александар Василевски-Нинџа – 8 години.
Обвинетиот Игор Дурловски беше ослободен од обвинението за тероризам, а трошоците за Дурловски паѓаат на товар на буџетот на Република Северна Македонија, и треба редовно да се јавува во суд.
И.Т. Зафировска
