Предизборно мразење, нечовечност, набедување и омаложување во полн ек и пред официјалниот старт на кампањата. Памфлети, брошури, пропагандни материјали и билборди со тони говор на омраза, осуда и враќање во незавидното минато. Што фали? Креативност? Инспирација? Не! Фали само малку човечност!
Изборните кампањи и онака со години имаат крајно навредувачки вокабулар, а истиот не изостанува и оваа година.
ВМРО-ДПМНЕ пред извесно време почна со пропагадата „Се срамам од овие луѓе – Заев е виновен“, расфрлајќи летоци низ македонските градови.
На герилата „Заробена држава – никогаш повеќе“ одговорија со „герила“ и на столче симболично ставија зајак со затворенички број, алудирајќи на тоа дека лидерот на СДСМ треба да заврши во затвор.
Но, тука омразата не завршува. Во главниот град осамнаа и билборди на ВМРО-ДПМНЕ со исклучително зајадлива содржина. Заев свртен со грб, како си заминува, со Луј Витон куфер, а во позадрина се претопуваат заматени лицата на Зоран Заев и првоосмничениот во случајот „Рекет“, Бојан Јовановски попознат како Боки 13. Случај кој во април минатата година, додека беше премиер Заев, го пријави во ОЈО.
Ниту Социјалдемократскиот сојуз не остана имун и врати на „црната“ пропаганда со летоци на кои покрај лидерот на ВМРО-ДПМНЕ, Христијан Мицкоски, може да се види и ликот на поранешниот премиер, сегашен азилант Никола Груевски. Фотографија која постојано ги навраќа граѓаните на не така далечното минато, на криминалот и корупцијата, и на многу друѓи проблеми, за кои сè уште нема епилог.
Сепек, очекувано, говорот на омраза, повиците за линч, посакување на туѓа смрт, доаѓаат најмногу и најчесто од социјалните мрежи. Посебно од „тврдокорните“ и самопрогласените патриоти, но и од редовните плукачи на власта, опозицијата, од неопределените…. Тука мора да се спомене ужасната слика за Прочка, на која е илустриран Зоран Заев, ни помалку ни повеќе, туку на бесилка.
Да не се заборави и дека наставничка пред неколку години на протест носеше крст со името на Зоран Заев, година на раѓање и смрт? Педагог за пример, par excellence. Посакување туѓа смрт? Каде со таа омраза и оргоченост?
Како одговорни пред себе и пред општеството, редакцијата на Фронтлајн ги повикува институциите веднаш да реагираат на ваквиот говор на омраза и изборни препукувања. Она што граѓаните го заслужуваат е политичка култура која пред сè треба да ја градаат оние што претендираат да дојдат на власт. Она што граѓаните заслужуваат е чисти улици, а летоци расфрлани на сите страни по улиците, поштенски сандачиња што ќе се полнат со корисни информации, а не со омраза, лажни вести и оргоченост. Она што граѓаните посакуваат е гледање напред во посветла иднина, а не враќање кон мрачното и режимско минато.
Политчки партии, политичари, нивни поддржувачи: Го валкате градот, ги валкате и душите и умовите на граѓаните, а не се живее само од чист образ. Оставете го минатато зад себе, закопајте ги секирите, казнете ги криминалците, најважни се граѓаните. Поради нив и за нив постоите. Оставете го народот вистински да почувствува дека државата е нивна, а не ваша. Покажете одговорност и одважност во носењето на важите одлуки.
Институции, санкционирајте! Доста е!
Тимот на ФРОНТЛАЈН
