Во Музеј галеријата во Кавадарци денеска беше отворена изложба насловена „Калеидоскоп”, на која се претставени дела од Маријана Иванова и Симона Трипкова, млади авторки, графички дизајнерки.
Се работи за плакатни решенија со кои тие учествувале или добиле награди на различни светски конкурси.
Директорката на Музејот, Весна Ѓорѓиева информираше дека настанот е реализиран во соработка со градоначалникот Митко Јанчев и Советот на општината, Музеј на град Скопје и со Мрежата на градови за уметничко творештво.
Билјана Галабова, кустос историчар на уметност во Музејот, рече дека плакатите треба да се третирааат со респект што го заслужуваат и тоа не само како уметнички дела, туку како и историски документи, кои низ столетијата наназад сведочат за одредена култура, па дури понекогаш повеќе и од историски текстови. Тие, нагласи, се одраз на одреден момент во времето, покажувајќи ги вредностите и интересот на одредена култура. Нивната интенција низ историјата нормално се менувала заедно со промените во уметничкиот свет, кои се поклопуваат со општествените промени и истовремено одговараат на нивните потреби.
– Би ја отворила изложбата со една порака од еден нивни плакат на кој е прикажан интергалактички пасош за новооткриената планета наречена Кеплер-452Б, за која се смета дека е најслична со планетата Земја и дека на неа постои можност за населување, а истата гласи, „Ве молиме не мигрирајте на Кеплер, ќе ја направиме нашата планета повторно да е прекрасна“, нагласи Галабова.
