Директорот на АВМУ, Зоран Трајчевски, откако првично беше контактиран од редакцијата на Фронтлајн и потврди дека до 9 март бил со семејството во Шпанија, и на прашањето зошто не е во самоизолација одговори „не знам што да ви кажам“, подоцна истиот ден ја поправи својата изјава откако во медиумите се рашири информацијата дека бил во високоризична земја зафатена со епидемијата на корона вирус и не е во самоизолација.
Во обид да ја намали штетата од информацијата, тој втор пат стапи во контакт со нашата редакција, која ексклузивно објави дека освен што Трајчевски бил со семејството во Барселона, на 9 март се вратил од таму, кажа дека поминал на контролата на аеродром како и сите други, бил прашан за симптоми и бил пуштен да помине.
Неговата изјава беше дека со семејството се вратиле на 9 март во земјава (понеделник), а тек во средата Шпанија била прогласена за земја со висок ризик.
„Во понеделникот се вратив од Шпанија, а во средата беше прогласена Шпанија за земја со висок ризик. Вчера бев на совет, а денес не сум на работа бидејќи сум на погреб, почина брат на татко ми“, изјави Трајчевски.
Дополнително на целото тоа, освен што Трајчевски не пристапил одговорно и продолжил таа недела да оди на работа и на службени состаноци, 3 дена по неговото враќање во земјава бил на работен состанок, а наредниот ден на погреб. Сето тоа во ек на ширење на заразна болест против кое се преземени најстроги мерки за избегнување големи собири и гужви.
А. Н. С.
