ПРЕМИЕРОТ Оливер Спасовски истакна – Нема нови мерки, сè продолжува да функционира како и вчера. Ќе направиме сè состојбата колку што е можно да се смени на подобро. Посебно до повозрасните сакам да порачам – Останете дома, ситуацијата е сериозна.
ДЕСКОСКА порача дека вонредна состојба не значи забрана за движење, ниту полициски час, ниту затворање на продавници. Ограничувањето не се однесува на човековите права и слободи, секој има право на лекарска помош, на право на слободна мисла итн, истакна Дескоска.
НОВИ шест милиони евра од денеска им се достапни на компаниите за бескаматни кредити за надминување на состојбата предизвикана од корона вирусот и заштита на ликвидноста и работните места, а како интервентен сет на мерки на стопанството наскоро ќе му бидат достапни околу 100 милиони евра за таа намена, најави денеска министерката за финансии Нина Ангеловска.
ТРГОВЦИТЕ и производителите имаат дадено збор дека нема да вршат зголемување, а сите цени кои се зголемени после 11 март 2020 година, согласно одлуката на Владата, ќе треба да се вратат на нивото на кое биле дотогаш.
ВИСТИНОМЕР со анализа за тоа со колку персонал располага државата и истакнува дека во првата линија на фронтот против „Ковид 19“ државата има на располагање над 50 илјади лица.
ЦЕЛАТА прехранбена индустрија е максимално мобилизирана. Има доволно залихи на сите основни артикли, нема потреба од панично купување на храна бидејќи има доволно за сите, ние делуваме антиципативно, истакна денеска на прес-конференција Ѓорѓи Петрушев од Здружението за земјоделство и преработувачка индустрија при Стопанската комора.
ВЧЕРА во Грција се роди првото бебе од мајка заразена со корона вирусот, а пак резултатите од првиот брз тест за Ковид-19 на новороденчето се негативни.
УТРОВО не се регистрирани нови заболени пациенти со коронавирус во земјата. Доцна синоќа, во рамките на скринингот, направени се тестови на 22 лица со поширока индикација. Сите 22 теста се негативни на вирусот, истакна министерот за здравство Венко Филипче.
АРМИЈАТА е подготвена да и асистира на полицијата, кризата е сериозна на глобално ниво и ако граѓаните не се придружуваат до мерките на Владата, разгледувајќи ги сите сценарија, ќе се воведат поригорозни мерки, истакна Шекеринска.
ДЕНЕС во Кина нема евидентирани нови случаи на корона вирус.
ЗОРАН Кондратенко со пофални зборови за третманот и вниманието што медицинскиот персонал од Инфективна клиника им го дава на заболените од корона вирусот. Луѓево од Инфективна се херои, не застануваат, негата е буквално 24 часа, вели Кондратенко.
