Претседателката на Европската комисија Урсула фон дер Лајен денеска изјави дека мерките потребни за да се спречи ширењето на коронавирусот, направија километарски гужви на границите, а луѓето и стоките се заглавени, во обид да стигнат до нивната дестинација.
– Важно е да го решиме ова сега, на почетокот на кризата, рече Фон дер Лајен во своето дневно видео обраќање.
Таа посочи дека има редици, долги десетици километри на некои европски граници, и дека на преминување на границата се чека и повеќе од 24 часа.
Таа рече дека ЕУ внимателно ги следи случувањата на границите, вклучително и преку сателитски снимки и дека разговорите со земјите-членки веќе покажуваат резултати.
– Имавме голем метеж на границата меѓу Словенија и Хрватска, но сега патиштата се проодни, посочи Фон дер Лајен. Таа верува дека ова е добар пример како соседните земји можат да најдат прагматични решенија.
Таа додаде дека се работело и на блокадите на патиштата кои постоеле на границите на Полска, Чешка, Германија и Литванија и дека на граѓаните на балтичките земји им било овозможено да се вратат во своите домови.
– На границата меѓу Унгарија и Романија имаше застој во сообраќајот повеќе од 20 километри. Треба да најдеме решение за многу бугарски и романски граѓани кои се обидуваат да се вратат дома, а камионите со стока треба да го продолжат патувањето, рече Фон дер Лајен.
Европската комисија предложи создавање на таканаречени „зелени линии“ кои би биле исклучиво наменети за товарниот транспорт и испорака на стоки неопходни за непречено функционирање на единствениот европски пазар.
