Секој ден посветувајте колку можете време на домашни активности кои ќе го анимираат вашето дете, а притоа имаат и едукативен карактер.
Специјалните едукатори и рехабилитатори Теодора Томовска и Магдалена Лазарова даваат идеи како со најминимален напор и скромни реквизити во условите на вашиот дом можете да искреирате активности кои ќе ги анимираат вашите деца во време на карантин.
Во изработувањето на активностите треба да бидат вклучени и децата. Секој ден изработувајте по една од понудените активности. Бидете креативни, забавувајте се, играјте си, гушкајте се, уживајте во моментите поминати со семејството и седете дома. Ви посакуваме убаво исполнето време со вашите најмили и многу забава и насмевки, велат специјалните едукатори и рехабилитатори Теодора Томовска и Магдалена Лазарова
Играњето е од клучно значење за развојот на децата. Преку игра се негува и односот меѓу родителот и детето, а позитивната атмосфера во текот на играта го охрабрува детето уште поактивно да се внесе во активноста. Направете интересни игри за вашите деца, импровизирајте и дружете се. Искористете ги работите што ги имате дома и направете нешто забавно за децата и за вас.
Разиграни броеви
Нацртајте низа на која ќе ги пишувате цифрите. Потоа нацртајте множества со јаболки. Исечете ги множествата во форма на круг. На детето дајте му инструкција, на пр., бројот 1 му го покажувате на листот или низата, а потоа го оставате или со ваша помош го барате соодветното множество според бројот.
Домино шпатули
На краевите од дрвени шпатули цртате различни форми. Истите форми што ги имате нацртано на шпатулите ги цртате и на бел лист хартија. Со детето правите фигура од шпатулите во зависност од спојувањето на формите. На пр., ако на едниот крај има круша и правоаголник, барате шпатула на која има нацртано круша и уште една форма. Откако ќе го завршите првиот дел од играта, следува вториот комуникациски дел. Вие му давате на детето лист со формите исти од шпатулите, а потоа му кажувате да ја најде соодветната шпатула. Важно во оваа активност е да го одржувате контактот со детето.
Овошна градина
На хартиени ролни од тоалетна хартија цртате овошја и ги лепите на картон. Истите овошја ги цртате и на бел лист. Ги сечете, па ги лепите на шпатули. Му кажувате на детето да ги најде јаболката. Вашето дете треба да го препознае и да го стави на соодветното место. На ист начин ја продолжувате класификацијата и со другите овошја.
Магична тегла
Во оваа игра можат да бидат вклучени сите членови на семејството. Магичната тегла се полни со ливчиња, а на секое ливче има напишано активност или прашање. Секој влече по едно ливче од магичната тегла и чита на глас што има напишано (доколку детето не знае да чита, тоа го прави родителот) и тоа треба да го направи, односно изврши, а потоа доаѓа на ред друг и така се врти кругот. Активностите и прашањата можете сами да ги смислите.
Кула од чаши
На пластични чаши се пишуваат броеви од 1 до 6. Колку членови ќе учествуваат во играта, толку сетови чаши се прават. Еден сет содржи 6 чаши. Секој фрла коцка и бројот што ќе се погоди, таа чаша ја зема и ја става, потоа следниот и така се врти кругот. Доколку му се погоди бројот од чаша која веќе ја има ставено, поминува неговиот ред и го чека наредниот круг за пак да ја фрла коцката. Победник е оној што прв ќе ја изгради кулата.
Извор: deca.mk
