Лидерска средба на која ќе се разговара за натамошниот тек на политичкиот процес во земјата, како и за можните термини за одржување на следните парламентарни избори, најави претседателот Стево Пендаровски за првата половина на следниот месец.
– Во овој период сите напори и државни ресурси треба да бидат насочени кон справување со пандемијата на коронавирусот, изјавија за МИА од Кабинетот на претседателот Пенадровски.
Од СДСМ сметаат дека сега не е време да се разговара за избори и нема потреба од лидерска средба, бидејќи фокусот е ставен на борба против коронавирусот.
-Ние сметаме дека не е време да се разговара за избори. Има време и ќе разговараме за тоа кога ќе дојде време. Наш главен фокус останува здравјето на нашите граѓани и економските мерки со цел да зачуваме повеќе работни места, да помогнеме на поголем број граѓани и да ја победиме оваа криза од коронавирусот, порача потпретседателот на СДСМ Коста Петров.
Од ДУИ велат дека сите позначајни одлуки треба да се донесат консензуално.
– Сите чинители сега треба повторно консензуално да се договорат за следните чекори, било тоа да е телефонски, преку видео-врска или во друга форма, велат од ДУИ.
Шефот на државата ја најави лидерската средба откако лидерот на ВМРО-ДПМНЕ, Христијан Мицкоски побара од него да свика средба во врска со иницијативата на СДСМ и коалициските партнери кои бараат повторното свикување на Собранието.
Мицкоски вели дека државата се наоѓа во многу деликатна ситуација, бидејќи поранешни пратеници не можат да поднесат иницијатива.
На последната лидерска средба што беше одржана во март партиите беа едногласни дека во услови на пандемија од коронавирусот, не треба да има избори, по што претседателот Пендаровски прогласи вонредна состојба за првпат во историјата на државата.
