Министерот за здравство Венко Филипче информира дека под 15 проценти од заболените од вирусот КОВИД-19 во земјава се на болничко лекување, дел се со полесни симптоми и на домашно лекување, а останатите се асимптоматски случаи.
– Некаде под 15 проценти е бројот на дијагностицирани лица кои се наоѓаат на болничко лекување, другите се со полесни симптоми и се на домашно лекување и останатиот дел се асимптоматски случаи, посочи Филипче во вечерашното интервју на Канал 5 телевизија.
Тој рече дека другите жаришта на КОВИД-19 во земјава, освен во Скопје, постепено спласнале.
– Предвидувањата на епидемиолозите, ова морам да го кажам со резерва, се дека следната недела, периодот што следи може да се очекува дека и скопското жариште постепено ќе спасне, рече министерот.
Филипче истакна дека асимптоматската трансмисија е една од најголемите слабости, не само во земјава, тука насекаде во светот.
– И затоа заземавме став да имаме една ваква агресивна стратегија, идентификување апсолутно на сите контакти на лица коишто имале претходно физички контакт со заболените лица со цел на време да бидат ставени во изолација, за тука да го пресечеме ланецот на пренос на инфекцијата и мислам дека во тоа успеавме, нагласи министерот за здравство.
Тој потенцираше дека е различен пристапот на тестирање во сите земји и затоа не може да се споредуваат бројките.
Вториот бран што дојде порано од очекуваното, повтори, се должи на непочитување на мерките.Олабавувањето на рестриктивните мерки се должеше на анализи и бројки, оцени министерот за здравство./МИА/
