Носителот од коалицијата „Можеме“ во Изборната единица 5 – Јован Митрески, во денешното обраќање за јавноста ги презентираше главните темели на програмата со која излегуваат на овие избори, и порача дека СДСМ е посветена на интересите на граѓаните.
Во изминативе три години направивме тектонски поместувања за сигурна иднина на нашата држава.
Го направивме тоа што 30 години го чекавме. Донесовме храбри и тешки одлуки за ги одблокиравме сите процеси. Станавме членка на НАТО, најмоќниот планетарен сојуз.
Не смееме да заборавиме ниту за еден момент што тоа значи за една мала држава како нашата. Сега сме безбедни! Сега рамноправно седиме на иста маса со најголемите светски сили!
СДСМ е посветена на интересите на граѓаните, на развој на домашната македонска економија, на продолжување на интегративниот процес во ЕУ, на грижа за ранливите категории, на обезбедување здрава животна средина, заштита на здравјето на граѓаните и загарантирана правда за сите.
Токму на овие столбови ја темелиме нашата понуда со која излегуваме пред граѓаните и ја бараме нивната доверба за нов, чист мандат за да ги предводиме институциите и во наредните четири години.
Градиме Правна и праведна држава. Расчистуваме целосно со груевизмот и неговите остатоци во судството.
Создаваме Европска земја. Европеизирањето ни носи ред, дисциплина, промена и иднина. Ја носиме Европа дома.
Нудиме нова македонска развојна економија, заснована на нови технологии, одржливост и човечки капитал. Модел што ќе ги штити работните места на граѓаните, ќе генерира повисоки плати и подобри работни места.
Платите ќе продолжат да растат. До 2024 година, минималната плата ја зголемуваме до 40 отсто, просечната плата ја зголемуваме до 30 отсто.
Ова е само еден дел од нашата понуда. Покажавме дека умееме.
Сите заедно ќе докажеме дека можеме уште повеќе и уште подобро, порача Митрески.
