Кампањата „Да создадеме свет без граници” е на иницијатива на Маргарита Маги Милошеска, мајка на девојче со попреченост. Мината недела, Милошеска со писмени покани ги повикала лидерите на политичките партии да дојдат во паркот Жена Борец во Скопје и да се потпишат на листата со барања во знак на поддршка.
Таа појаснува дека се работи за документ составен од десет точки, во кои се бараат подобри услови за живот на децата со попреченост, со кои исто така ќе им се олесни и животот на родителите.
Во барањата од родителите на овие деца, наведени се неколку идеи како што се: да можат да одат во пензија на 55 години, зголемување на додатоците, тргнување на возрасната граница од 26 години за овие лица во здравството, и измена на други закони, со цел лицата со попреченост да добијат подостоинствен и полесен живот.
На средбата свој потпис дале СДСМ, Левица, Македонски концепт и Алијанса за Албанците, а ниту еден претставник од ДУИ не појавил на настанот.
На средбата дошол и претставник од ВМРО ДПМНЕ, но не го потпишал документот со барањата.
Разочарувачки е, вели Милошеска, бидејќи се работи за две големи партии. Благодарни сме им на сите политички партии кои дојдоа и го потпишаа документот со нашите барања, и со тоа се заложија за нивно исполнување. Разочарана сум што воопшто не се појавија од ДУИ, очекував дека ќе дојде нивни претставник.
Исто така, разочарана сум од најголемата опозициска партија ВМРО ДПМНЕ, бидејќи не сакаа да се потпишат. Ветија со збор дека ќе ни даделе можеби и повеќе од тоа што бараме, но ние имаме искуство со ветувања во ветар во минатото, и не сакаме повеќе да веруваме. Но, можеби е и фер од нивна страна да не го потпишат она за кое не се сигурни дека ќе го остварат. Сепак, мора да потенцирам дека нашите барања се многу издржани и нема ништо посебно што не би можело да се оствари, изјави Милошеска, која исто така е координатор во Ресурсен центар на родители на деца со посебни потреби.
